許先生去年以約三十二萬元購入的二手保時捷跑車，只駕駛了一個月便要維修，豈料車房拖足一年仍未修好，更愈整愈壞。（王偉洪攝） 

投訴

車房劏客實錄　維修波子拖足一年

有讀者一年前向相熟車房購買二手保時捷跑車，豈料收車後問題多多，車房假意維修，實情愈整愈壞，拖足一年仍未交車，跑車更已擺放至發霉，讀者大呻信錯人。

許先生為愛車之人，去年經相熟車房 Carrera Autosport老闆黃永光介紹，以近三十二萬元購入黃名下的保時捷 996 Carerra 4，雖然車齡已十二年，不過許先生對「棍波」跑車情有獨鍾，買入後亦不惜再花錢讓黃的車行維修「執漏」。可惜許先生取回跑車後駕駛不足一個月，車內 CD機及通訊系統便失靈，後來連車頭燈亦自動熄滅，許於是再將跑車交予黃修理，可惜問題仍未徹底解決，更試過駕駛時車尾突然出煙，許先生憶述：「（黃）佢同我講唔好意思，話會再整過架車，只收我零件錢，唔收師傅人工錢。行內整 Porsche出名嘅車房唔多，呢間係出名，惟有繼續俾佢整車。」
不過這次「入廠」，竟然等足一年都未整好！許先生等候期間多次催促黃儘快修車，黃亦多次答應「過兩個禮拜一定俾到」，結果許先生向黃發律師信作「最後通牒」，黃即承諾一星期後交車，但黃再度違反承諾兼「玩失蹤」，許忍無可忍終下決定自行僱用拖車到 Carrera Autosport，將坐駕拖至保時捷官方維修廠捷成維修，卻赫然發現坐駕已五勞七傷：「我見到架車封晒塵，道門仲發咗霉！」捷成驗車時發現跑車內電線接駁得亂七八糟，跑車更已「撻唔着」，評估後認為此車維修費最少需十七萬元，許先生大感不滿：「黃生整咗成年，但而家仲衰過以前，（架車）得番個殼唔行得！」

跟進：拖足一年車身發霉

根據公司註冊處資料， Carrera Autosport Ltd.於○五年成立，大股東為黃永光，公司曾於○八年被入稟小額錢債審裁處追討交通意外賠償。此外黃永光亦為另一車行 Amazing Touch Ltd.的大股東，該公司曾起用藝人周秀娜為代言人，又大搞團購，標榜能於極短時間內修補汽車刮痕等瑕疵。

(繼續閱讀...)